Азар «Реал» билан келишиб олди

Эден Азар «Реал» билан тузилажак битим шартлари борасида тўлиқ келишувга эришди. Бу ҳақда Tuttomercatoweb хабар тарқатган.

Нашрнинг аниқлашича, 28 ёшли футболчи «Сантьяго Бернабеу»да бонуслардан ташқари йилига 15 млн евро маош олади. Трансфер 90-100 млн еврога баҳоланмоқда, аммо ҳамон «Челси»нинг розилиги олингани йўқ.

Агар «қаймоқранглилар» Азар билан шартнома имзолаб, унга 15 млн евро йиллик иш ҳақи тайинласа, у ҳолда Эден янги клубида энг кўп маош олувчи футболчига айланади. Ҳозирда бу мақом Гарет Бэйлга тегишли – у йилига 14 млн евро олмоқда. Серхио Рамоснинг маоши 11 млн, Карим Бензема ва Лука Модричники эса 10 млн еврога тенг.

Маълумот учун, бельгиялик хавбек бу мавсум «кўклар»нинг барча мусобақалардаги 39та ўйинида майдонга тушиб, 27та голда бевосита қатнашди (16+11). «Челси» уни 2012 йилда «Лилль»дан 35 млн еврога сотиб олганди.

Эслатиб ўтамиз, Азарнинг «қироллик клуби» билан оғзаки тарзда келишиб олгани ҳақида аввал ҳам хабар тарқалган, у ўтган ҳафта охирида «буларнинг бари миш-миш» эканини айтганди.

Бунга қадар «Реал» қизиқиш доирасидаги Килиан Мбаппе мадридликлардан йиллик 15 млн евро, Поль Погба эса 16 млн евро маош талаб қилаётгани хабар қилинганди.