Янгиликлар

Азар: Буларнинг бари миш-миш

24.03.2019

Эден Азар «Реал» билан оғзаки келишувга эришгани ҳақида тарқалган хабарларни рад этди.

Азар айни вақтда Бельгия терма жамоаси базасида бўлиб турибди. Бугун, 24 март куни бельгияликлар 2020 йилги Европа чемпионати саралаши доирасида кипрликларга қарши 2-тур учрашувида майдонга тушади.

«Буларнинг бари миш-миш. Бу хабарларда ҳақиқат йўқ. Мен ҳозирда бор эътиборимни Кипрга қарши ўйин учун жамлаганман. Ҳозир бундан бошқа гапни ўйлаётганим йўқ», — дея Азарнинг сўзларини келтирган Sky Sport.

Азарнинг «Челси» билан амалдаги шартномаси муддати 2020 йилнинг ёзига қадар тузилган. Бундан аввалроқ, лондонликлар бу футболчисини кейинги йил ёзида текинга кетмаслиги учун шу йил ёзида сотишга розилиги ҳақида хабарлар тарқалганди. Англия нашрларида тарқалган хабарга кўра, Зидан Азарни «Реал»га ўтишга кўндирган, у 5 йиллик шартнома тузишга рози бўлган, мадридликлар бу футболчи учун 65 млн евро таклиф қилишган.